TONGGO GONDANG TURUN

Penulis; Patuan Raja Bonar Siahaan

Ia lapatan ni turun, ima na panangkok saring-saring ni Ompu. Ai molo paturunhon halak, naung tuk do sibahenonna dibagasan sipitu ari i (saleleng pesta i). Nasa na ro tu turun i ingkon sude mangan, dang jadi adong namulak so jolo mangan. Ima namargoar: “Silundu ni pahu, si hindat hudon tu harpe. Sipamulak na bosur, sipaniho na male”.
Ragam do pondok ni jolma taringot tu TURUN, adong na mandok: PATURHON, adong mandok tongka do na turun, nangkok do dohonon, ninna. Gabe digoar ma; panangkok saring-saring.
Molo pinaihut-ihut do nuaeng angka hata ni partonggo-tonggo nunga godang na so domu tu ulaon (horja) i. Nunga godang holan ramos ni UMPASA. Gabe dang piga be na boi si ihuthono ni sundut na mangihut, Jadi pianatorng ma jolo taringot tu tonggo-tonggo na masa ngalia di alaman tingki pesta turun.

Mangido gondang:
1. Alu-aluhon majolo tu Ompunta Debata ……
2. Alu-aluhon majolo tu namartua …. (boi di goari, boi di pajempek) na lumiat, na lumolot, na humarpe na di banuaon. (nungnga gok na jinouhon i, dang adong be na so disi).
2. Alu aluhon ma tu sahala ni Raja na hasantian natinongos ni Debata Mulajadi Nabolon, ima tu Siraja Batak namanusun sianjur mula-mula sianjur mula jadi.
3. Alu-alu hon ma tu Sahala ni namartua Raja Uti, Raja hatorusan, hashatan ni somba tu Debata Mulajadi. Sipajalo-jalo suhe, sipajalo-jalo somba, namian di pulo marsala di topi ni laut Barus.
4. Alu-aluhon ma muse tu sahala ni Raja nahasantian, Tuan Sorimangaraja: Muala ni pambirbiron manjadi pambarbaron, mula ni panguhiron manjadi panggorgaon, parholiton (hapideon) mula ni hamoraon, panggalangon mula ni harajaon, parbuason mula ni edang-edang paung mangirik-irik naso jadi pautangon, ugasan lume naso jadi doboon, irik mangirik-irik tomu manomu-nomu naso jadi ihoton, sampak aek asa masibodilan gotil lanok asa masibajoan, handang na so langkaan abor na so jadi suruhon. Sige mangoro bagot (borta) parbue jomputon mangoro boru (parumaen). Tuhe ni juma darat sanggar molo so hadudu, tuhe ni juma saba pangko molo so bulu, tanda ni hata sae, ingkon mardalan pago-pago tu amanta raja pangulu. Pinodahon ni raja na hasantian Tuan Sori Mangaraja, na garam di panggaraman na gurum di panguruman, na tangkas di hata-hata na sungkum di undang-undang, na sungsang di hamonangan horbo paung ni portibi.
5. Alu-aluhon ma muse tu Sahalani Raja Singamangaraja, Raja mangolompoi Raja so halompoan, anggi ni partubu haha ni Harajaon. Ditano Bangkara julu di Tano Bangkara jae Bangkara tonga-tonga, panungkunan di uhum panandosan di tano. Mula ni solup siopat bale, ampang si samppuludua solup, parmasan sisampululima solup, angkut-angkut siualu solup. Gantang pamudoran, hatian so ramonggal, ninggala sibola tali. Sitingkos ni ari Sijujung ni ninggor, uhum na so lobi adat na so husor. Molo mardalan Singamangaraja tanggal do na dibeangan malua na di ihotan, tu rumbungan do bodil tu rampean do hujur. Sipalua na dapot sambil sirungrungi na dapot bubu.
6. Alu-aluhon ma muse tu sahala ni amanta raja dohot tu amanta juara natorop, na diantaran na bidang di lobuan na godang on, na marsihahai marsianggii di tording ni partubu dohot di harajaon.
Nungnga di alu-aluhon ho i amang batara guru humundul, tangihon ma hatangkon: Gongkon sipaimaon jou-jou sialusan, ia ro gongkon ni amanta suhut dohot jou-jouna sahat ma tu alaman, pangantaranon, pangantaran ni anak pangantaran boru on, hundul di amak tiar, tiar ma panggabean tiar ma parhorasan. Pinangan indahan na las hinabosurhon lompan natabo hinasagathon, pamurnas tu daging ma i saudara tu bohi, gabe ma na niula sinur na pinahan, horas na mangathon gabe ma na mangalean.

• Dison parbue gantang parbue bota, tonggi pe na maduma tonggian ma na mamora, sipasihar panaili, sipaneang holi holi, panduran barita pangidoan tondi godang. Nauja napande napantas marboru, bulan opat bulan lima bulan onom bulan pitu bulan ualu bulan sia bulan ho hape di parhutasadaan mi, i pe asa mulak ho tu toding banuami.
• Dison musengani miak-miak mahasa, miak ni ompunta sibasonabolon,asa anggiat miak roha ni Ompunta Debata.
• Dison napuran na martomu uruk, na lima saparangguan, na opat sada hundulan, na sauli-ulina sagodang-godangna. Ringgit sitio soara asa dipatio dipabuntu gabe ni naniula sinur ni na pinahan,
Ima siala na panangkok saring-saring ni ompu……tu batu napir tu tambak natimbo, di ari na denggan di bualn na uli on, sahat ma uli tu joloan ni ari on: Asa martumbur ma baringin martantan Hariara, matorop madingin matangkang ma juara.
Binagan ni si poring ma binongkak ni Tarabunga, mate tu sanggara ma amporik mate tu ruang ma satua. Magodang ma naummetek uluson pura-pura, simbur simbur laho magodang penggeng laho matua.
Artia bona ni ari sipaha sada bona ni bulan, nunga dapot na jinalahan tarida na niluluan.
Pasahat ma i amang batara guru humundul tu Ompunta Debata Mulajadi Nabolon, ia hurang gok nahudok i asa gok ditongos panggabean parhorasan, ia hurang jojor na hudoki asa jojor ditongos panggabean parhorasan.
Nunga dipasahat ho i, baen ma;

1. Gondang somba-somba i tu Ompunta Debata.
2. Nunga dibahen ho i baen ma gondang mula-mula i: Ima mula tompa, asa toga, togu, neang ni holi-holi gabe ni na niula sinur ni na pinahan di amanta pangulu oloan, inanta parsanngul baringin nasada hasuhuton halangan gordang bolon, nasahat tu langit natandos tu tano on. Dohot mula jadi, mula anak tubu, mula ni boru sorang, mula ni homban, mangirikhon parhombanan mula ni tapian manjadi parjumaan, hatopan hadomuan, hadomuan parsadaan. Asa tiur songon ari rondang songon bulan tio songon baba ni mual rintar songon bonag di gala panggabean parhorasan. Dohot mula iyang, asa iyang anak tubu iyang boru sorang, asa maisorang, songon mata ni ari binsar, songon bulan na poltak, songon ombun na humirtap, songon haloho na lumolo, na umbostang di portibi na humarpe di banua. Najumujung panguhatan, najumujung aek natio, asa dipatio dipabuntu gabe ni naniula sinur ni napinahan, di anak na maisorang di boru na marharatan.
3. Nunga dibahen ho i amang, bahen ma sampur marmeme i. Asa sampuran nasuksuk tu sampuran maragap-agap, haroan marharoan di amanta hasuhuton. Jungjungan dakka sangkotan baringin, di amanta hasuhuton songoni di juara na torop, asa pinggan puti panibalan ni daum, asa sorang anak dohot boru nauli sitongka ma marlapung. Na ambit di ampotna, na onsop di tarusna. Nasimbur magodang napenggeng matua, nagodang-godang ansimun songon ulloson pura-pura, napenggeng matua songon batu ni ruma.
4. Nunga dibahen ho sampur marmeme, bahen ma sampur marorot. Asa giring-giring gosta-gosta, asa huhut mangiring-iring huhut marompa-ompa di pomparan ni si sada hasuhuton, sisada parsaulian, sisada parsaoran bolonon. Asa tampunak ni sibaganding ma diginjang ni pangiringan, sai masitogu-toguan ma tondi ni na metmet dohot na magodang jala masipairing-iringan.

MULA JADI
Ia pandohan di halak Batak nagalia: molo martonggo (martangiang) manang mangalehon pasu-pasu, ingkon di pili do sian pandohan na martondi (na marhomban). Ia lapatan ni homban: Adong hagogoan na so dapot berengon ni mata, alai boi dihilala roha. Songon i do isi ni hatak Batak (pasu-pasu). Dang tarpangke di tonggo-tonggo holan ramos ni pandohan dohot ribur-ribur ni hata, ingkon hata na marimpola do sidohonon.
Molo didok tompa, nunga adong disi panghilalaan mula ni jolma, alai marrupahon aek dope i (adong sijadion ni Debata). Dung adong, dijadihon ma i manjadihon rupa sian dua pistik, ima namargoar anak ni mata. Digoar ma i asal mula jadi, dijadi ma jolma i mangihuthon purbana, lapatanna: Purba Raja, Purba Nabegu, Purba Datu, Purba Tungkang, Purba Parhauma dohot na asing. Dung sidung mula jadi, marudut ma i tu mula iyang. Ia lapatan ni mula iyang, nunga margoar i ditiha tondina, alai dang dope paltak di ida natorop, ima margoar di homban. Marhite i ma muse jumujung aek natio, alai na nialap do pandohan sian hata na manghunti pagar, alana haduk do dohonon manghunti pagar di hatoropan. Lapatan ni na manghunti pagar: Ala marbalanjo pagar do namarhomban i laho mangaramoti pamatangna.

SAMPUR MARMEME
Ia lapatan ni sampur marmeme, i ma na mandok: Hipas ma na ro i jala hipas na nidapotna so haribo-riboan, sisae soada mara, na hu ditaonna na gok dibulanna.

SAMPUR MAROROT
I ma na tangkas tubu, tangkas hona meme, tangking di abara, sahat tu na mangiring-iring dohot mangompa tinodohonna sahat tu na magodang, sahat saur matua.

Dung sidung sampur marorot di pangido muse si bane-bane. Taringot tu si bane-bane adong do mandok jumolo i sian sampur marmeme, alai sarupa do i manang dia jumolo asal molo pameakkon ni hata pandohan ni namangido gondang i.
Pandohanna; Nunga di suhui ho i amang batara guru humundul partarias na malo baen ma si bane-bane si banda-ulu, hita sora mate begu pe sora mamunu, asa anggiat bane ni roha ni Ompunta Debata na mangalehon na tapangido inon. Songon bota-bota sinege, songon manuk mira polin di alaman, asa bulu di holbung so haliapan, hapur di tangan so habubuhan pomparan ni anak pomparan ni boru. Asa sigurampang nabolon tu sigurampang anak-anak, gok sopo nabolon maruli sopo si anak-anak. Sian na panakkokhon bona ni hasuhuton di saring-saring ni ompu nasida di ari nadenggan di bulan nauli on. Tu tambak na timbo tu batu na pir. Asa pir ma tondi madingin horas tondi matogu. Ia dipanangkok nasida ma i tu tambak na timbo, nangkok ma panggabean nagkok ma parsaoran.
Asa marurat ma baringin martantan hariara, matorop ma maribur matangkang ma juara. Tubu anak panibal, par mas jala pareme. Natau tundun natau asang-asang, pangaramot di pintu julu pangaramot di pintu jae. Pamuro somantat sior parmahan somantat batahi bahen ma amang si bane-bane i.

Dung sidung si bane-bane, boi ma mangaliat paniaran manortor. Jala boi ma pangidoan todo-todoan, lapatanna: Haro-haro : Gondang Debata: Sihutur Sanggujl dohot na mardomu tusi. Alai molo di jabu, boi do pangidoon marsada-sada (gondang jujungan) Ima, gondang saksak: Habonaran manang siboru naramosan; Simangot ni ompu.
Molo holan ama do na manortor, boi do ragam pangidoon, ima : Gondang malim, margulang ombun, saniang naga di aek, saniang naga di tur, gondang surung-surung. Ia gondang surung-surung, marguru tu halak ni namangido gondang do i. Ia datu do hombar tusi ma dibahen pargonsi, ia raja do hombar tusi ma, ia nabegu do hombar tu habeguon ma di bahen. Molo didok; sudarahon, hombar tusi ma dibahen.

Boi do pajempehon pangidoan on hombar tu tingki, Songon on ma: Gondang mula-mula. Sibaso Nabolon, Gondang mangaliat. Ditingki na mangaliat panortor nunga boi disuhui gondang i, alai ingkon malo do namaguluhon jala pande pargonsi mangantusi. Songon on ma pambahenna: Dibahen namanguluhon i ma tanganna duansa dompak pargonsi i manang asa di suhui manang di tungkar, nungnga di boto pargosi i manang dia parjolo dohot parpudi. Dung sidung mangaliat tolu hali, dipangido ma hasahatan. Sahat-sahat ni solu ma sahat ma tu bontean. Nungnga sahat ulaonon sahat ma hita tu pangabean sahat tu parhorasan. Alai molo di Pangordang manang di Silindung, sahat-sahat tu solup ma sahat ma tu bontena, nungnga sahat ulaonon sahat ma tu gabena sahat tu horasna (alana dang tarida be solu disi). Ia lapatan ni bonte i ma bale ni solup na di tundunna i. Jala opat hali balena do solupna.

HASAHATAN
Dung sidung angka suhu-suhu ni gondang dipangido raja manang dongantubu, boru hula-hula, pangidoonna ma hasahatan. Molo dongan tubu songonon ma dohononna; Ia nungnga sahat nuaeng dia ri nadenggan di bolan nauli, ulaon na panangkok saring-saring ni natua-tua (Ompu)… Sahat nauli sahat gabe ma di pomparan ni parsadaan (Ompunasida). Sahat-sahat ni solu ma sahat tu bontean. Nungnga sahat ulaon i dipatupa bona ni hasuhuton, sahat ma gabe sahat tu parhorasan. Sitorop ma dangkana sitorop ma rantingna. Ia torop hahana torop ma nang angina.

Molo anggi manang haha marsiulaon goar ni hasuhuton ma jumolo dohononna. Tutu ma ninna anduhur tio ma ninna lote, nasa hata nauli unang muba unang mose. Siingoton : Molo di hasahatan nungnga sae tolu umpama.
Boru : Nunga sahat ulaon ni hula-hula namion, di ari na denggan di bulan nauli on, sahat mauli ma tu joloan on. Sahat-sahat di solu ma sai sahat tu bontean, nunga sahat ulaon on sahat ma tu panggabean. Tambor ma di bonana rugun ma di punsuna. Gabe ma amana, tampak dohot boruna.

Hulahula : Ompung Debata sitolusada, naung sahat di ari nadenggan di bulan nauli on ulaon ni gomparan namboronami on, sahat mauli ma tu joloan ni ari on, sahat gabe gomparan ni borunami on di anak naung sorang dohot nanaeng sorang dope, songon i nang di angka tubu ni boruna.

Nunga marsuhusuhu nangkin songon gondang, marsialusalusan songon ogung, hata ni gabe-gabe, horas-horas sian dongan ganup masijaloan songon tangan mangido songon sonduk mala tondinami, mamasumasu ma dohot Ompunta martua Debata.
Sahat-sahta ni solu sahat ma tu bontean, nunga sahat ulaon i, sahat ma tu panggabean. Tangkas ma uju purba tangkasan uju angkola, tangkas ma gabe huhut maduma tumangkas ma gabe huhut mamora gomparan ni boru nami i. Tutu ninna anduhur, tio ninna lote, nasa hata nauli unang muba unang mose.

Suhut mangampu. Nunga marliat-liat raja ni dongan tubu, raja ni boru songon i nang hula-hulanami. Ba liat ma di hami panggabean liat ma parhorasan. Sian naung dipasahat hula-hula ma ulos natogap, ba togap ma tondina mangulosi hami, ba ampu ma di ampuannami, jujung ma simajujungnami panggabean parhorasan.
Ba bahen ma ama pargonsi si monang-monang, asa pangkat ma marbunga hotang tusi ma hami mangalangka tusi ma dapotan pangomoan.
Nunga dibahen ho simonang-monang, bahen ma sitio-tio. Asa tutu ninna anduhur tio ninna lote, nasa hata nauli unang muba unang mose.

Nunga dibahen ho i, ba bahen ma panggohi ni ulaon on, asa gok di hami panggabean parhorasan.
Mangaliat ma hasuhuton tolu, lima manang pitu hali. Nangkok ma nasida tu jabu. Saudarahononna ma i jala ndang jadi maradian gondang i paima ro hata mandok maradian. Dung maradian hona sangke ma doal.
Dison tarida holan suhut do mangido si tio-tio lao sidung gondang. Ia sitio-tio pinangido ni suhut sihabolonan, asing do i sian angka natorop manang raja. Sitio-tio pinangido ni raja manang songon dia sahala ni daging na tarsunggul do i. Ia sitio-tio pinangido ni suhut sihabolonan, gondang panggohi do i domu tu gala panggabean parhorasan. Songon i ma jolo na tarbahen dison.
Na hurang sirsir tapasirsir musengani, na humurang gok tatambai musengani.